بقلم/ هلال البنا .
....................كنتي
كنتي حلوه يابتسامه
لما كنا صغيرين
بالبرائه والسلامه
ولما كبرنا روحتي فين
هي ماتت الشهامه
واغتلوكي البني آدمين
كنت عايش باستقامه
بهدلوها شمال يمين
كان زمان مرفوعه قامه
بين الناس طول السنين
عشت محفوظه الكرامه
وجم داسوها الكدابين
كنت كافي خيري شري
وانحوجت للبخيل
وإللي عالم كل سري
هو بس ربي الجليل
بدعي ربي كشف ضري
وياما جابلي المستحيل
عمري فايت دغري يجري
وفي الآخر ما لقيت خليل
هو انا ظلمت نفسي
بالتبذير وكان كتير
قلت عالخير ماتندمشي
ودلوقتي مريض كبير
كنتي حلوه يابتسامتي
وكان زمان الطيبين
ماشي عايش باستقامتي
وبهدلوها شمال يمين
مش زعلان من الزمان
زعلان علشان الغلطان
من أحبابي ومن أصحابي
ومن إهمالي والنسيان
و آخد بالي و شايف حالي
وكان زمان مايجيش في بالي
وإن الدور لازم يدور
يجرى كل اللي جرالي
إبيض شعري والشيب بان
وراح حماسي وانا هفتان
ليه الناس نسيوا الغلبان
والإنسان طبعه النسيان
أنا زعلان منك يازمان
أنا غلطان بس مش زعلان
شايف نفسي مهمول منسي
أعوذ بالله منك يا شيطان
أنا غلطان وإيه ها يفيد
إبني و بنتي واللا حفيد
لما بقوم نفسي امسك إيد
إيد تسندني ونور بيقيد
مين يحضني وحب يزيد
لما يزروني بس ف العيد
وازيك ويبوسني ويمشي
ويطلع يجري سايبني قعيد
إسمعني يابو قلب حديد
واليوم جاي من غير مواعيد
عمري وعمرك يعلم ربك
راح ترتاح وهاتبقى سعيد ؟
لما بقيت فوق الستين
قولت خلاص ترتاح بسلامه
واللي شوفته في عمري سنين
شقيان وعرقان بكرامه
كان في شبابي وشغل الإيد
والأسباب من فضلك سيدي
واللي في جيبك ستر العيب
خلا الكل صاحبي وحبيبي
وانا وصحابي ولبس عياقه
لعب و خفه وكل رشاقه
والنشاط كان ألف قيراط
والثقافه و اللباقه
إللي باقي مني بكام
غير دلوقتي بس كلام
أمشي وساند ع الحيطان
واحسب في عدد الأيام
كنتي حلوه يابتسامه
لما كنا صغيرين
والبرائه والسلامه
لما كبرنا روحتي فين
هي ماتت الشهامه
........واغتلوكي البني آدمين
عشت ماشي باستقامه
.........وبهدلوها شمال ويمين
كنتي
تعليقات
إرسال تعليق
ملاحظة:
-لا تنشر تعليقات غير مرغوب فيها. ستتم إزالته فور مراجعتنا
- تجنب تضمين عناوين URL الخاصة بموقع الويب في تعليقاتك.