عادات العقل« مكتسبة لا فطرية»دكتوره نفيين مكي مبتدأ ميديا | علوم وثقافة عامة''

بقلم /دكتوره نيڤين مكى.

                     (خلى بالك من عقلك)

*دا مش اسم فيلم دى نصيحة غالية اوى.

*اصل عقلك دا هو الكنز اللى ربنا اهداه اليك.

عشان كده لازم تعود عقلك يعمل الحاجات المفيدة ويفكر بطريقة صحيحة بدون جهد أو عناء..عارف دى تبقا اسمها ايه......!!؟؟

اسمها "العادة العقلية".

انت عارف يا بطل انك ممكن تعمل لنفسك اتجاه عقلى معين فى عادة معينة و إن دا شىء سهل جدا.

*المهم قبل ما اقوللك ازاى تعمل كده لازم تعاهدنى أن العادة دى تكون إيجابية وتكون خطوة فى تحقيق أهدافك و حلمك .

بص ياسيدى..اى عادة عقلية عايز  تتعود عليه بتمر بثلاث مراحل أساسية والمراحل دى بتكون عبارة عن انتقال تدريجى للعادة من العقل "الواعي" للعقل "اللا واعى".

ولو مش عارف اد ايه قوة العقل اللا واعى يبقا لازم تقرأ عنه كتير.

نرجع لموضوعنا "ازاى بتتكون العادة العقلية؟؟؟؟".

قولنا أن العادة العقلية بتمر بثلاث مراحل أساسية وعلشان نقرب الصورة اكتر  بمثال "تعلم قيادة السيارة" مثلا.. هتبقى ايه الثلاث مراحل بتوع العادة دى؟؟؟.

١- المرحلة الأولى بيكون فيها العقل "الواعي" شغال بأقصى درجة من الإنتباه والتركيز والعقل "اللا واعى" لسه بيتفرج من بعيد ؛ بمعنى إنك بتكون ماسك فى عجلة القيادة بكل ما فيك من قوة وانتباه وتركيز  ومش قادر تعمل اى عملية عقلية بالتوازي مع العملية دى( قيادة السيارة).

٢- المرحلة التانية بيكون فيها العقل الواعي إتعود شوية على عملية القيادة وبيقوم  بها بشكل متوازن مع بداية تدخل من العقل اللا واعى ؛بمعنى انك اصبحت متعود شوية على القيادة وأصبحت شبه عادة وانك بتقدر تقوم بعمليات عقلية متوازية مع نفس وقت عملية القيادة ؛ يعنى ممكن ترد ع التليفون او تكلم اللى جانبك بشكل سلس الى حد ما.

٣-اما المرحلة الثالثة فبيكون العقل "اللا واعى" استلم المهمة والعقل "الواعى" نفض أيده منها وأصبحت العادة العقلية هنا فى أيد أمينة وهى العقل "اللا واعى"يعنى أصبح من الصعب جدا الرجوع عن هذه العادة.

العالم "هوريس مان"من اكتر من ٤٥سنة وقبل ما نعرف مصطلح "عادات العقل" كان بيقول أن العادة مثل الحبل الغليظ الذى نضيف له كل يوم خبط رفيع حتى يصبح حبل متين لا نستطيع قطعه أبدأ ؛ و دا اللى أثبته العلم الحديث بالفعل .. **ومعنى أن العقل اللا واعى تسلم المهمة أصبح العقل الواعي حر ويقوم بكل الأعمال المتوازية بشكل سلس جدا وعادى؛ يعنى بتبقى سائق العربية وبتتكلم وتشاور وتاخد قرارات وكل حاجة  ولا كأنك سائق وكأنك ماشى ع الأرض عادى بس اسرع شوية لكن لابس قميص واسع شوية ومراعى حجمه وبس.

                       (خلاصة الكلام)!!!

انك تملك زمام نفسك وعقلك ولو عايز تتعود ع الصح هتقدر ولو فى أحلك الظروف"كل الحدوتة شوية مجهود"على رأى الكينج😎

يعنى هتتعب شوية صغيرين فى الاول لكن هترتاح بعد كده على طول وهتلاقى نفسك بتعمل كل المهارات اللى عودت عقلك عليها بدون عناء أو ومشقة ..وهو دا المطلوووووب...شوفت الموضوع سهل ازاااااى..