كيفية المذاكرة والحفظ بسرعةإزاي تعمل جدول للمذاكرة

كيفية المذاكرة والحفظ بسرعةإزاي تعمل جدول للمذاكرة.

المذاكرة

كتب عراقى صلاح.

 كيفيةالمذاكرة والحفظ بسرعة....

في حلقة من حلقات واحد من ال talk shows المشهورة اللي كانت بتتقدم في كان ضيوف الحلقة بيل جيتس ووارين بوفيت، المذيع سأل كل واحد فيهم سؤال مهم وهو إزاي بينظموا وقتهم.

بيل جيتس قال أن الوقت بتاعه بيبقى مشغول قوى بينما وارين بوفيت قال أنه بيحرص يسيب مساحات فاضية في جدوله اليومي علشان التفكير، يعني ممكن يقعد فترة كبيرة من غير ما يعمل حاجة مجرد بيفكر بس.

علشان كده تنظيم الوقت بيختلف من شخص لآخر ومفيش حاجة معينة ممكن تتطبق على الكل، يعني انت ممكن تسأل نفسك أسئلة زي:

-اجيب وقت اذاكر كل المواد الدراسية دي منين؟

-إزاي اعمل أي حاجة ترفيهية في يومي وميبقاش اليوم كله مذاكرة والوقت محدود كده؟

أيام الامتحانات مش بلاقي وقت اعمل أي حاجة.

في الحقيقة بسهولة ممكن تعمل جدول وتلتزم به أثناء المذاكرة والدراسة باستخدام أفكار بسيطة زي.

الأول حدد نمط تعلمك، هل انت بتحب تتعلم باستخدام مواد مرئية ولا سمعية ولا حسية...ممكن مثلا لو بتحب تتعلم بشكل سمعي تخصص في جدولك فترات كبيرة تسمع فيها الحجات اللي عايز تذاكرها.

الثاني حدد انت بتبقى نشيط ومركز امتى، هل الصبح أحسن أوقات تركيزك ولا بعد الظهر مثلا وعلى الأساس ده هتعرف تزود فترات المذاكرة امتى.

اكتب كل المواد المطلوب منك تذاكرها في ورقة، لما تشوف الحاجة مكتوبة قدامك مخك هيعرف يتخيل إيه المطلوب منه.

الثالث حدد أوقات الامتحانات والاختبارات والمشاريع المرتبطة بالمواد المختلفة، ده هيديك فكرة امتى تكثف أوقات المذاكرة في المواد دي.

الرابع حدد أهدافك في المذاكرة وقسمها لخطوات صغيرة، يعني مثلاً ممكن يكون مطلوب منك تخلص 100 ورقة في مادة معينة في شهر، ممكن تقسمهم بحيث كل أسبوع تذاكر 25 ورقة فبالتالي تحدد كل يوم هتذاكر قد ايه في المادة دي.

الخامس حدد إيه الهوايات والأنشطة المختلفة اللي بتحتاج تمارسها أثناء الأسبوع ظي القراءة مثلا أو الرسم أو رياضة معينة.

باستخدام الورقة والقلم قسم يومك لفترات زمنية، الفترة تكون حوالي 30 دقيقة وبعد كده 10 دقائق راحة.

املى الفترات دي يالمهام المطلوبة منك يومياً بس طبعاً تبقى مراعي الأولويات، يعني لو انت عارف ان عندك امتحان في يوم معين فممكن تزود المذاكرة في المادة اللي هتمتحن فيه اليوم اللي قبله وهكذا.

خليك حريص برضه أن الهوايات والأنشطة الترفيهية يكون ليها مكان في الجدول، ده هيساعدك على تنشيط وتجديد طاقتك.

في الأول ممكن تعمل جدول لأسبوع بس ولما تتعود على الموضوع ممكن بعد كده تعمل جدول لشهر وهكذا.

لما تتعود على الموضوع هيبقى عادة في حياتك وهتحس بالانجاز لأنك خلصت المطلوب منك من غير توتر أو ضغط بالإضافة انك مارست هواياتك أو أي نشاط بتحبه.